Сідаркевіч Людміла Аляксандраўна

  Артыст, вядучы майстар сцэны. Працуе ў Рэспубліканскім тэатры беларускай драматургіі з 1995 года, адразу пасля заканчэння вучобы на акцёрскім аддзяленні Беларускай акадэміі мастацтваў. На яе рахунку ўвасабленне характару Жонкі пісара ў вадэвілях У.Галубка і Л.Родзевіча "Паваліўся нехта", Наталлі Ломавай і Таццяны Шыпучынай ў вадэвілях Чэхава "Прапанова" і "Юбілей" (спектакль "Шампань-скага!"), роля Вольгі ў гульнях дарослых "Містэр Розыгрыш" С.Кандрашова, увасабленне жаноцкасці (Яна) у трылер-кліпе "Апошняя пастараль" паводле А.Адамовіча, Лялька ў спектаклі "Развітанне з радзімай" паводле п'есы А.Паповай, Паўлінка ў фантасмагорыі С.Кавалёва "Стомлены д'ябал", Ліў у спектаклі "Жанчыны Бергмана" М.Рудкоўскага, пастаноўка В.Анісенкі, роля Бландоі ў спектаклі "Балада пра Бландою" С.Кавалёва, пастаноўка У.Паржэцкай. На Рэспубліканскім конкурсе (1998г.) акцёрскіх дуэтаў "Прызнанне ў каханні" Людміла Сідаркевіч адзначана званнем лаўрэата. Акцёрскія працы ў сезоне 1998/99 гг. прынеслі ёй галоўны прыз Беларускага саюза тэатральных дзеячаў - "Крыштальную кветку надзеі". За ролю Фанні ў абсурдзе Г.Ахтэрнбуша "Бот і яго шкарпэтка" журы фестывалю сучаснай нямецкай п'есы прысудзіла актрысе дыплом за лепшае выкананне жаночай ролі, на фестывалях "Маладзечанская сакавіца-99" і "Славянскія тэатральныя сустрэчы-99" (г. Бранск) Л.Сідаркевіч атрымала галоўны прыз за лепшае ўвасабленне ролі Жанчыны, (Яна, згодна з аўтарскай назвай персанажа) у спектаклі "Апошняя пастараль". У 2002 г. на фестывале "Славянскія тэатральныя сустрэчы-2002" (г.Бранск) Л.Сідаркевіч атрымала спецыяльны прыз за ўвасабленне ролі Ліў у спектаклі "Жанчыны Бергмана" М.Рудкоўскага, пастаноўка В.Анісенкі. Апошнімі акцёрскімі работамі Людмілы Сідаркевіч з'яўляюцца ролі Сястры, Ільвіцы ў дзіцячым мюзікле-пародыі "Айбаліт, Бармалей, пра жывел і Брадвей" Ул.Аксенкруга, Ізабелы П'емонцкай у спектаклі "П'емонцкі звер" А.Курэйчыка; "Жан і Беатрыса" К.Фрэшэт - Беатрыса; Канчыты ў спектаклі "Ганна ў тропіках" Ніла Круза; Ганерыльі ў спектаклі "Кароль Лір" У.Шэкспіра; Трэпольскай, Тары, Сакратаркі ў спектаклі "Шлях у Царград" Зорана Косціча; Ганны Пятроўны ў спектаклі "Іванаў" А.Чэхава.